Banyamakuru, Bavandimwe,

Nagiraga ngo mbashimire guhora muharanira kugeza ku baturarwanda, abarundi n'abandi baturage bo muli Afrika yo hagati amakuru n'ibitekerezo biturutse impande zose.

Muzi ko RDR ali Ihuliro Liharanira Itahuka ry'impunzi na Demokrasi mu Rwanda , kandi ko duharanira Ubwiyunge bw'Abanyarwanda mu Gihugu cyubahiriza Amategeko. Ni yo mpamvu nagiraga ngo mbasabe urubuga ngeze ku banyarwanda no kuli Prezida Kagame icyo ntekereza kw'ijambo yavuze mw'iyimikwa rye, cyane cyane ku kibazo yavuze asaba ko Impunzi zose zataha.

Général Paul Kagame ntabaye uwa mbere uhamagaliye impunzi gutaha. Icyakora icy'imena twafatamo ni uko Kagame yiyemereye ko hakili impunzi zitarataha. Kandi koko hanze y'igihugu haracyali impunzi za mbere ya 1994 zitarataha, ziyongeyeho iza nyuma y'uwo mwaka. Kuva RDR yashingirwa muli Zayire muli 1995, twasabye ko leta ya FPR yakwemera ko dushyikirana kugira ngo dutahe mu mahoro, iranga.

Icya mbere dushaka kwibutsa Prezida mushya w'u Rwanda ni ukwo mu nama y'akarere yahuje impunzi z'abanyarwanda n'ubutegetsi bwa Republika ya Kabili i Dar Es-Salaam taliki ya 19 z'ukwa kabili muli 1991, abali bayirimo bumvikanye ko hadashobora kubaho amahoro arambye igihe hakili impunzi hanze.

Icya kabili ni ukwo impunzi z'icyo gihe zanze gutaha hatabaye imishyikirano ya politiki kugira ngo zimenye uruhare zizagira mu nzego za politiki. Agomba kwibuka lero ko impunzi zose ali zimwe . Niba ashaka ko impunzi zitaha yagombye kubanza kwemera gushyikirana nazo, akumva akababaro kazo. Niba lero adashaka ko dushyikirana kugira ngo yumve ibibazo byacu, ibindi alimo avuga ni ukwikoza ubusa.

Kuva kera na kare, RDR ivuga ko gushyikirana alibyo ntango y'ubwiyunge kugira ngo abanyarwanda babane mu mahoro, kugira ngo higwe ukwo ikibazo cy'impunzi cyarangira no kugira ngo intambara n'imidugalaro ijyana nayo biveho burundu.

Abambari n'intagondwa za FPR ni bo bakomeje kwangira iyo mishyikirano yo kugira ngo twumvikane ku ngingo fatizo zo kugira ngo u Rwanda rugarukemo amahoro burundu.

RDR ibona nta mahoro azaba mu gihugu igihe nibura ingingo zikulikira zitazaba zubahirijwe:

• Nta muntu ugomba kwongera guhutazwa azira ubwoko bwe cyanga ibitekerezo bye;
• Umuntu ntagomba guhatirwa gukunda FPR , ibintu byo kwita abicanyi abantu bose batavuga rumwe na FPR bigomba gucika;

• Ingabo cyanga inzego z'umutekano ntizigomba kuba iz'umuntu cyanga iz'ubwoko, kuko zigomba kurengera umunyarwanda wese zitarebye aho abogamiye muli politiki;
• Abakada n'abandi bahungabanya umutekano w'abaturage bagomba kuvanwa mu giturage;
• Abantu bafungiwe ibitekerezo byabo bya politiki n'abandi bafungiwe kuregwa ubwicanyi nta kimenyetso kibafata bagomba gufungurwa nta mananiza;

• Umuntu agomba kwishyira akizana mu bintu bye, agahinga isambu ye nta nkomyi. Abali mu by'abandi bagomba kubivamo bidatinze; Ntawe ugomba kwongera guhezwa mu kwishakira akazi n'icyamutunga;
• Ntawe ugomba kongera guhatirwa gusenya inzu ye ngo ajye kurara rwantabi no ku gasi mu midugudu, imidugudu igomba kugibwamo n'uyishaka;
• Ntabwo akarengane kazashira mu Rwanda nta demokarasi isesuye ihali, ngo abantu bahagaralirwe n'abo bahuje ibitekerezo n'inyungu, ntabwo hazaba amahoro mu Rwanda umuntu adafite urubuga yihitiyemo kugira ngo avugiremo akababaro n'ibibazo bye.Umuntu agomba kujya mw'ishyaka yishakira , kandi amashyaka ntagengwe na FPR; Amashyaka agomba guhabwa urubuga kandi akigenga ;
• Hagomba kubaho amatora asesuye, azira igitugu n'igitsuri, akorwa mu kwishyira ukizana kwa buli muntu, kugira ngo rubanda ruhagaralirwe n'abantu rufitiye icyizere cyo kurengera inyungu zarwo.

Mugire amahoro n'imigisha .

Mbashimiye kuza kumpa umwanya wo kuvuga kuli Gahuza miryango ibi bitekerezo byacu.

Ndereyehe karoli

Prezida wa RDR.